“Забаўлянкі для Янкі” – сустрэчы-семінары для маладых беларускіх бацькоў

27 кастрычніка (нядзеля) у Віцебску распачынае сваю дзейнасць праект асветніцкіх сустрэч-семінараў для маладых бацькоў «Забаўлянкі для Янкі»! Праект адрасаваны сем’ям, якія жадаюць выхоўваць сваіх дзетак сапраўднымі беларусамі.

Беларуская традыцыйная культура мае багатую спадчыну ў галіне этнапедагогікі. Назапашаная вялікая колькасць твораў дзіцячага фальклору, але ў сучасных умовах пераважная колькасць бацькоў не мае магчымасці скарыстацца гэтым багаццем, бо нават беларускую мову не надта часта пачуеш у паўночным Віцебску. У большасці беларускіх сем’яў, а таксама ў навучальных установах, наўпрост адсутнічаюць традыцыі выхавання на аснове народнай педагогікі.

 

Студэнцкае этнанграфічнае таварыства “Поўнач” ака “Паўночная Сухадроўка” абрала лепшае для вашых дзетак ад беларускай традыцыі. Падчас шэрагу сустрэч у межах праекта “Забаўлянкі для Янкі” маладыя бацькі змогуць даведацца пра традыцыйнае выхаванне па-беларуску, пазнаёміцца з беларускім дзіцячым фальклорам і навучыцца выкарыстоўваць яго ў штодзённым баўленні часу з дзіцяці. Разам з бацькамі развучым беларускія калыханкі, забаўлянкі ды сапраўдныя беларускія гульні для гарманічнага развіцця вашага малечы! У межах праекта ладзяцца адмысловыя майстар-класы, на якія запрашаюць прыходзіць разам з дзеткамі. Ужо 27 кастрычніка ў 12.00 – зручны час для маладых мамачак – у выставачнай зале “Задзвіння” (вул. Чайкоўскага, 3) адбудзецца майстар-клас па нашэнні слінга ад прафесійнага кансультанта, а таксама прэзентацыя ўласна праекта “Забаўлянкі для Янкі”. (Слінг - перавязь з тканіны для нашэння дзяцей, адно з самых старажытных прыстасаванняў для нашэння дзяцей). Уваход на мерапрыемствы праекта – вольны.