Творчыя чацвяргі падвядуць вынікі Года культуры

Супольнасць Vitebsk4Me і Віцебскі цэнтр сучаснага мастацтва запрашаюць на фінальную прэзентацыю моладзевых праектаў, якія былі здзейсненыя ў межах “Творчых чацвяргоў”. 

У Год культуры маладыя людзі з Віцебска займаліся карыснымі грамадскімі справамі, якія папярэдне выпрацоўвалі ў межах сустрэч “Творчы чацвер”. Ім у гэтым дапамагалі дзяржаўныя ўстановы культуры і мастацтва: бібліятэкі, музеі, выставачныя залы, універсітэты, органы мясцовай улады і інш.

Мы на 100% ўпэўненыя, што вы чулі пра некаторыя з гэтых спраў. Графіці з Казімірам Малевічам, лекцыі “Наука вне себя”, конкурс для маладых дызайнераў “Айдэнтыка Віцебска”, свята “Адамаўскі фэст”, выданне кнігі “50 музеев Витебска”. Гэтыя і шэраг іншых грамадскі карысных праектаў былі прадстаўленыя і ацэненыя на сустрэчах “Творчых чацвяргоў”. Там жа яны шукалі партнёраў і шляхі для развіцця. 

Год культуры падыходзіць да канца, а разам з ім прыйшоў час падводзіць вынікі вялікай працы, якую зрабілі маладыя людзі. Аўтары праектаў распавядуць пра свае поспехі і праблемы пад час правядзення падзей, перспектывы на будучыню.